View Text
Heyle be þu mary þo moder of cryste
heyle be þo bleste þat euer bare chylde
heyle be þu conseyuyde all by lyste
þi son ihu bothe meke and milde
heyle meydon swete þat neuer was fylde
heyle weyle and wytte of all wysdum
heyle feyrer þen þo flowre vnfylde
Ave Regina celorum
heyle comly qwene comforth of care
heyle godly lady bothe feyr and bryght
heyle þo socur of all owre sare
heyle þo lampe þat lenys hus lyght
heyle godly lady in þe was plyght
þo Ioy of mon bothe all and sum
heyle tabarnabull hee on heyght
Mater Regys angelorum
heyle cumly qwene þo feyryst of all
heyle in þe owre blys is bredde
heyle on þe all wemen wyl call
when þei with chylde ben by stedde
heyle þat all fyndes wyll drydde
and schall do to þo dey of dom
with meydyns mylke þi chylde þu fydde
O Maria flos virginum
heyle þo feyryste of all gud [...]
heyle þat god schase to his borore
heyle þo lampe þat euer is lyghtand
To hye and lowe to ryche and pore
heyle swetur þen ony savowr
heyle þat all owre Ioy of come
heyle of all wemen frute and flowre
velud Rosa vel lillium
heyle gudly grownder of all grace
heyle blestefull starne of þo see
heyle þo saluer of owre solase
heyle þo chese of chastite
heyle þo well of all mercy
heyle þat bare god of heyvn
heyle þo tempull of þo trinite
funde preces ad filium
heyle blestfull virgyn of all virgyns
heyle meydyn moder and blestfull mey
heyle þe norse of swete Ihu
heyle gudly qwene as þu wele mey
heyle he lady to þi son þu prey
þat we mey cum to his kyngdome
for hus and for all oder þu prey
Et pro salute fidelium